ສະຖານທີທ່ອງທ່ຽວ
ຫໍຄອຍຊ້າງບ້ານນາ
ການກະກຽມອອກເດີນທາງໄປສູ່ຫໍຄອຍຊ້າງບ້ານນາ, ເມືອງທ່າພະບາດ ແຂວງບໍລິຄຳໄຊ ເຊິ່ງເປັນສະຖານທີ່ທີ່ມີຊື່ສຽງສົມຄວນໃນການເບິ່ງຊ້າງທີ່ຫໍຄອຍ
ເຊິ່ງມີຄວາມສູງຕັ້ງຫລາຍ ແມັດ ແລະຄຳວ່າ ຫໍຄອຍກໍ່ບໍ່ໄດ້ຫມາຍຄວາມວ່າຈະອຳນວຍຄວາມສະດວກທຸກຢ່າງໃນການພັກແບບຄ້າງຄືນ
ເຊິ່ງທຸກຢ່າງລ້ວນແຕ່ມີການກະກຽມຂອງບັນດານັກທ່ອງທ່ຽວໂດຍສະເພາະ
ກໍ່ແມ່ນຜູ້ທີ່ຕ້ອງການຢາກເຫັນຊ້າງປ່າດ້ວຍຕາຕົນເອງ.
=======================================================================
ນ້ຳຕົກຕາດມັງກອນ
ຕາດມັງກອນ ຫ່າງຈາກບ້ານທ່າບົກ, ເມືອງທ່າພະບາດ 3 ກິໂລແມັດ, ຈາກທາງເລກທີ 13 ໃຕ້ລ້ຽວຊ້າຍ ເຂົ້າໄປຫາຕາດ ປະມານ 2 ກິໂລແມັດ ເປັນທາງດິນແດງ ທ່ານສາມາດ
ໄປທ່ອງທ່ຽວ ດ້ວຍການຂີ່ລົດ ຫຼື ຍ່າງຊົມປ່າ, ນ້ຳຕົກ (ໃນຊ່ວງລະດູຝົນ) ໄລຍະບຸນເຂົ້າພັນສາ, ເໝາະສຳລັບການພັກຜ່ອນ ແລະ ກິນເຂົ້າປ່າ
=======================================================================
ຕາດໄພວັນ ເມືອງໄຊຈຳພອນ
ເປັນຕາດແຫ່ງໜຶ່ງ ຢູ່ໃນກາງດົງຕຶບໜາ ເຕັມໄປດ້ວຍສີຂຽວງາມ, ມີທຳມະຊາດທີ່ສວຍສົດງົດງາມ, ມີພູຜາປ່າໄມ້, ມີສຽງນົກ, ສຽງກາຮ້ອງ ທີ່ໜ້າປະທັບໃຈ ພ້ອມດ້ວຍສຽງນ້ຳຕົກຕາດ ມາຈາກຈອມຜາ ທີ່ມີຄວາມສູງ ປະມານ
100 ກວ່າແມັດ, ທັງສອງດ້ານ ຂອງຕາດດັ່ງກ່າວ
ຍັງມີຖ້ຳທີ່ໜ້າສົນໃຈ ຂອງສີ່ງທີ່ມີຊີວິດ ແລະ ເປັນບ່ອນທີ່ຢູ່ອາໃສ ຂອງສັດນາໆຊະນິດ
ໂດຍສະເພາະແມ່ນ ເຜິ້ງທີ່ອາໃສຢູ່ໃນຖ້ຳ. ສະນັ້ນ, ຈຶ່ງຕັ້ງຊື່ຂອງຖ້ຳທັງສອງວ່າ: ຖ້ຳເຜິ້ງໄພວັນ
ແລະ ຖ້ຳຄົງເຄັງ. ຈາກນັ້ນໃນຂອບເຂດ ບໍລິເວນຂອງຕາດ ເຕັມໄປດ້ວຍດອກໄມ້
ທີ່ເກີດຈາກທຳມະຊາດ ທີ່ບານຕາມລະດູການ (ພິເສດຍາມເດືອນ 04 ແລະ ເດືອນ 05) ແມ່ນມີດອກໄມ້ທີ່ເບັ່ງບານ ຕາມລຽບຝັ່ງແຄມນ້ຳ
ແລະ ຕາມຜາໃນບໍລິເວນຕາດ, ໃນນັ້ນ ຜູ້ທີ່ໄດ້ພົບເຫັນ
ຖ້ຳເຜິ້ງດັ່ງກ່າວນັ້ນ ແມ່ນພໍ່ຕູ້ ຫຼ້າເຄນ ໄດ້ພົບເຫັນຖ້ຳໄພວັນ ແລະ ພໍ່ຕູ້ ຄົງເຄັງ
ໄດ້ພົບເຫັນຖ້ຳເຜິ້ງຄົງເຄັງ ເພາະລະຫວ່າງຕາດດັ່ງກ່າວ ເປັນເສັ້ນທາງຜ່ານໄປມາຫາສູ່ ລະຫວ່າງ ລາວ ແລະ ຫວຽດນາມ ແຕ່ສະໄໝສົງຄາມ, ມາຮອດປະຈຸບັນ ແມ່ນມີເສັ້ນທາງລົດ
ໄປມາໄດ້ຮອດຕາດ, ແຕ່ເສັ້ນທາງດັ່ງກ່າວ ຍັງບໍ່ທັນສະດວກ, ໄລຍະຫ່າງຈາກ ເທດສະບານເມືອງ ໄປຫາຕາດໄພວັນ ມີໄລຍະທາງ ປະມານ 40 ກວ່າກິໂລແມັດ, ຫ່າງຈາກບ້ານປະຊາຊົນ ປະມານ 10 ກິໂລແມັດ, ສ່ວນຕາດໄພວັນ ແມ່ນໃກ້ກັບຊາຍແດນລາວ - ຫວຽດນາມ, ເກັບກຳຂໍ້ມູນໃນວັນທີ 31 ກໍລະກົດ 2012.
=======================================================================
ພະບາດໂພນສັນ
ວັດພະບາດ ເມືອງທ່າພະບາດ ແຂວງບໍລິຄຳໄຊ
ເປັນວັດເກົ່າແກ່ມີຊື່ສຽງແຫ່ງໜຶ່ງ ໃນຈຳນວນບັນດາວັດທີ່ຕັ້ງຢູ່ລຽບແຄມທາງເລກທີ
13 ໃຕ້ ຄວາມມີຊື່ສຽງທີ່ພຸດທະສາ ສະນິກະຊົນນິຍົມສັດທາ
ບໍ່ສະເພາະແຕ່ໃນແຂວງບໍລິຄຳໄຊ ແລະ ນະຄອນຫຼວງເທົ່ານັ້ນ
ແຕ່ຢູ່ທາງລຽບຝັ່ງຂອງ ເບື້ອງປະເທດໄທ ກໍຖືວ່າເຫຼື້ອມໃສສັດທາ
ຕໍ່ວັດພະບາດ ເໝືອນກັນ ທີ່ຕັ້ງຂອງວັດຢູ່ເທິງໂນນຫີນສູງ ໃນເນື້ອທີ່ 12 ເຮັກຕາ ທຸກສິ່ງປຸກສ້າງນັບແຕ່ອາຮາມ ຮອຍພະບາດພະທາດ
ຫໍພະນອນ ຫໍແຈກ ກຸຕິ ບ່ອນປະຕິບັດທຳຂອງ ພະພິກຂຸ
ລ້ວນແຕ່ຖືກປຸກສ້າງໃສ່ເທິງພະລານຫີນທັງນັ້ນ ດັ່ງນັ້ນ ສິ່ງທີ່ເປັນຖາວອນວັດຖຸໃນວັດ
ຈຶ່ງເກີດຂຶ້ນຈາກແຮງສັດທາ ຫຼືການບໍລິຈາກ ຈາກຜູ້ໃຈບຸນທັງຫຼາຍ ແລະ
ກ່ວາຈະສຳເລັດແຕ່ລະຫຼັງ ທີ່ຢູ່ເທິງພະລານຫີນ ບັນດານາຍຊ່າງ
ກໍສູ້ຊົນຜ່ານຜ່າ ເຈາະສີ່ວຫີນເຫຼົ່ານັ້ນ ເພື່ອການກໍ່ສ້າງອັນແສນລຳບາກ
ຈົນສຳເລັດ.
=======================================================================
ຕາດວັງຟອງເມືອງປາກກະດິງ
ຕາດວັງຟອງ ເມືອງປາກກະດິງ
ເປັນບ່ອນສ້າງຄວາມອຸດົມສົມບູນ ໃຫ້ແກ່ຊີວິດແນວຄິດສົດໃສ ເພາະມັນແມ່ນ ທຳມະຊາດລ້ວນໆ
ອາກາດສົດໆ ຊື່ນຊົມກັບຄວາມ ງາມຂອງຜາຫີນ ຕາມສອງຟາກນ້ຳ, ນ້ຳຕົກຕາດ ແລະ ທຳມະຊາດ ທີ່ເປັນຮູບຊ້າງ.
ຕາດວັງຟອງ ແມ່ນຕາດໜຶ່ງ ທີ່ຢູ່ຕາມສາຍນ້ຳກະດິງ ແລະ ນອນຢູ່ໃນໂຄງການ ຂອງລັດຖະບານ
ເພື່ອສ້າງເຂື່ອນໄຟຟ້ານ້ຳຕົກ, ສະຖານທີ່ແຫ່ງນີ້ ຈະໄປຮອດດ້ວຍທາງເຮືອ ຕາມສາຍນ້ຳກະດິງ ປະມານ 40 ນາທີ ຈາກບ້ານໂພງາມ
=======================================================================
ນົກນັບພັນໂຕຢູ່ພູໂນນຫີນ
ຖ້າຫາກຈະທ່ຽວແບບຊົມທຳມະຊາດຕາມສະຖານທີ່ຕ່າງໆໃນເມືອງປາກກະດິງ
ແຂວງບໍລິຄຳໄຊ ກໍ່ມີຫລາຍບ່ອນທີ່ປະທັບໃຈ ແລະ ມີອີກບ່ອນຫນຶ່ງທີ່ຢາກແນະນຳໃຫ້ໄດ້ເບິ່ງນັ້ນກໍ່ຄືພູໂນນຫີນ,
ທີ່ຕັ້ງຢູ່ບ້ານໂນນ,
ຖ້າເຮົາຂີ່ລົດກາຍທາງເຂົ້າຫລັກ 20 ເມືອງຄຳເກີດໄປ ປະມານ 20 ກວ່າກິໂລແມັດ
ກໍ່ຈະເຫັນພູໂນນຫີນທີ່ຕັ້ງຢູ່ບ້ານດັ່ງກ່າວ ແລະ ແປະກັບສາຍທາງ ເລກທີ 13 ໃຕ້, ພູດັ່ງກ່າວມີລັກສະນະສູງເນີນ ແລະ
ມີທາງຂຶ້ນຫລາຍທາງ ພ້ອມປົກຄຸມດ້ວຍປ່າໄມ້ສີຂຽວອຸ່ມທຸ່ມຕະຫລອດປີທັງເປັນບ່ອນຢູ່ຂອງຝູງນົກຫລາຍພັນໂຕອາໄສໃນພູແຫ່ງນີ້.
=======================================================================
ຖ້ຳແກບເມືອງປາກຊັນ
ແຕ່ບູຮານນະການ ເຄີຍເລົ່າກັນມາວ່າ:
ໃນເວລາເດືອນດັບວັນສິນ ຢູ່ທີ່ປາກຖ້ຳແຫ່ງນີ້ ໄດ້ມີຂີ້ແກບ (ເຂົ້າ) ໄຫຼອອກກອງກັນ
ຢັ່ງຢາຍເຕັມໄປຕາມບໍລິເວນ ດັ່ງກ່າວ, ແຕ່ປະຈຸບັນ ບໍ່ຍັງເຫຼືອໄວ້ໃຫ້ເຫັນອີກແລ້ວ. ຍັງເຫຼືອໄວ້ແຕ່
ຄວາມງາມຂອງ ທຳມະຊາດນ້ຳຕົກນ້ອຍ ແລະ ຄວາມຫຼາກຫຼາຍສີສັນ ຂອງດອກໄມ້ປ່ານາໆ ຊະນິດ ທີ່ສົ່ງກິ່ນຫອມຫວນທົ່ວບໍລິເວນ.
ສະຖານທີ່ດັ່ງກ່າວ ຕັ້ງຢູ່ບ້ານໜອງບົວ, ເມືອງປາກຊັນ, ຈາກຕົວ ເມືອງຕາມທາງໄປຫາ ບ້ານນາເຂົ້າລົ້ມ (ທິດໃຕ້) 15 ກິໂລແມັດ. ຖ້ຳແກບ ແມ່ນຕັ້ງຢູ່ຂົງເຂດ
ບ້ານໜອງບົວ, ເມືອງປາກຊັນ,
ຫ່າງຈາກຕົວເມືອງປາກຊັນໄປ ປະມານ 24 ກິໂລແມັດ. ລົງມາຕາມສາຍທາງເລກທີ 13 ໃຕ້ ປະມານ 4 ກິໂລແມັດ, ແລ້ວລ້ຽວຊ້າຍເຂົ້າທາງແດງ ເມື່ອໄປເຖິງ
ບ້ານໜອງບົວ ກໍ່ຈະແນມເຫັນສະຖານທີ່ ທ່ອງທ່ຽວແຫ່ງນີ້ ເປັນພູທີ່ມີປ່າໄມ້ຕຶບໜາ
ຢູ່ທາງເບື້ອງຊ້າຍມື. ສະຖານທີ່ທ່ອງທ່ຽວແຫ່ງນີ້ ເປັນສະຖານທີ່ທີ່ມີຄວາມສົມບູນຂອງທຳມະຊາດ,
ປະກອບດ້ວຍປ່າໄມ້ທີ່ຕຶບໜາ ແລະ
ພືດພັນຫຼາຍຊະນິດ
=======================================================================
ຖ້ຳຜາເມືອງ
ຖ້ຳຜາເມືອງ ຂຶ້ນກັບເມືອງບໍລິຄັນ,
ຖືເປັນແຫຼ່ງທອ່ງທ່ຽວ ອີກບ່ອນໜຶ່ງ
ທີ່ມີຄວາມງາມ ແບບທຳມະຊາດຂອງຜາຫີນ
ແລະ ຖ້ຳ, ພ້ອມທັງ
ເປັນບ່ອນທີ່ເລົ່າລືກັນມາຢ່າງຊ້ານານ ກ່ຽວກັບເລື່ອງ 'ນາງ ຜົມຫອມ' ສະຖາທີ່ຕັ້ງຢູ່ ບ້ານຜາເມືອງ, ເມືອງບໍລິຄັນ, ຕາມທາງເລກ 4B ຈາກເມືອງບໍລິຄັນ ໄປ 54
ກິໂລແມັດ
=======================================================================
ທຳມະຊາດປ່າຫີນຕາມທາງເລກ 8
ກ່ອນຈະເຖິງເມືອງຄຳເກີດ (ຫຼັກຊາວ)
ຈະໄດ້ພົບເຫັນຄວາມງາມ ຂອງທຳມະຊາດປ່າຫີນພູໄຮ, ພູຜາມ່ານທີ່ມີຄວາມສູງຊັນຂຶ້ນຮອດຈອມພູ
ແລ້ວຄືກັນກັບວ່າພວກເຮົາໄດ້ຂີ່ຍົນ ຊົມທຳມະຊາດ ເພາະມັນຢູ່ຈຸດສູງ ແລະ ສາມາດຫຼຽວເຫັນ
ຄວາມງາມຂອງທຳມະຊາດໄປໄກສຸດສາຍຕາ.
=======================================================================
ດານຫີນບ້ານໜອງສາມານ
ພະລານດານຫີນ ທີ່ຄົງຄວາມງາມຢ່າງມີສະເໜ່ ແລະ
ຕ້ອງເຮັດໃຫ້ຜູ້ທ່ຽວຊົມຕື່ນໃຈ ເມື່ອພົບເຫັນ ເພາະມັນເປັນດານຫີນທີ່ກວ້າງແຕ່ 100 ເຖິງ 150 ແມັດ, ແລະ ມີຄວາມຍາວຫຼາຍກິໂລແມັດ ເຊື່ອມຕໍ່ກັນ,
ມີພູກອງເຂົ້າ ເປັນກຳແພງຫີນ ທີ່ມີຄວາມສູງຊັນ 20-25 ແມັດ, ຍາວ ປະມານ 200 ແມັດ, ອ້ອມຂ້າງດ້ວຍດານຫີນ, ມີຕົ້ນຈັນໄດ ແລະ ດອກໄມ້ປ່ານາໆພັນ. ທຳມະຊາດແຫ່ງນີ້
ຍັງໄດ້ຍິນສຽງນົກເຂົາຂັນ, ນົກກາຮ້ອງ
ບວກກັບສຽງນ້ຳຕົກຕາດຊ້າງ ໄຫຼລົງຕີນຜາຫີນ ຟັງສຽງແລ້ວໜ້າອອນຊອນ. ຕັ້ງຢູ່ບ້ານໜອງສາມານ,
ເມືອງປາກຊັນ (ຕາມຈ້າຍພູກະດັນ ເບື້ອງຕາເວັນອອກ)
ຈາກຕົວເມືອງ 37 ກິໂລແມັດ.
ສະຖານທີ່ທ່ອງທ່ຽວແຫ່ງນີ້ ຕັ້ງຢູ່ບ້ານໜອງສາມານ, ເມືອງປາກຊັນ, ຫ່າງຈາກຕົວເມືອງໄປ ປະມານ 30 ກິໂລແມັດ. ໄປຕາມເສັ້ນທາງເລກທີ 13 ໃຕ້ ປະມານ 26 ກິໂລແມັດ, ແລ້ວລ້ຽວຊ້າຍ ເຂົ້າໄປຕາມທາງດິນແດງ ປະມານ 4 ກິໂລແມັດ, ກໍ່ຈະເຫັນດານທີ່ກວ້າງ ແລະ ຍາວລຽບຕາມແຄມທາງ
ເບື້ອງຊ້າຍມື.
=======================================================================
=======================================================================
=======================================================================
=======================================================================
=======================================================================
=======================================================================
=======================================================================
ไม่มีความคิดเห็น:
แสดงความคิดเห็น